Gunnborg er á sínu öðru tímabili með SR og varð strax einn af máttarstólpum liðsins þegar hún gekk til liðs við félagið frá Malmö Redhawks í Svíþjóð. Hún var stigahæst SR-inga á síðasta tímabili og fimmta stigahæst í Topp-deild kvenna. Nú þegar núverandi tímabil er hálfnað er sama staðan upp á teningnum, efst SR-inga og í fimmta sæti í Toppdeildinni. Gunnborg gefur allt í hvern leik og hverja skiptingu og gengur fram með góðu fordæmi.

Sölvi hefur verið einn af öflugustu og mikilvægustu leikmönnum SR í mörg ár, leikmaður sem alltaf skilar sínu fyrir liðið. Sölvi hefur verið mjög ofarlega á lista yfir stigahæstu leikmenn síðustu fimm tímabil, síðan hann kom heim eftir tvö tímabil í Finnlandi. Í ár þegar tímabilið er um það bil hálfnað er hann þriðji stigahæsti í bæði SR og Toppdeildinni. Sölvi hefur verið aðstoðarþjálfari kvennaliðs SR í fjölda ára og stutt dyggilega við uppbyggingu kvennahokkís hjá félaginu.

Sölvi og Gunnborg eru bæði hluti af fyrirliðateymi sinna liða og ganga fram með góðu fordæmi fyrir aðra leikmenn sem og yngri SR-inga. Þau eiga farsælan feril að baki og mjög bjarta framtíð fyrir sér.

Við óskum þeim innilega til hamingju með titilinn.

Að auki veitti stjórn sjálfboðaliðum viðurkenningar fyrir óeigingjörn störf í þágu félagsins á árinu. Eins og allt íþróttastarf byggist uppbygging og rekstur SR nánast alfarið á góðvild foreldra, aðstandanda og annara velunnara félagsins sem leggja til sinn tíma og vinnu. Í ár voru það Atli Andrésson, Bjarni Þór Einarsson, Björn Guðmundsson, Dagur Þór Aspar, Jóhann Agnar Einarsson, Jón Gunnar Guðjónsson, Karen Linda, Ívar Pétursson og Melkorka Otradóttir. Við þökkum þeim kærlega fyrir sitt góða framlag.

Jóhann kom aftur heim í SR eftir tvö ár í Tékklandi fyrir síðasta tímabil og stimplaði sig rækilega inn í deildina og liðið með frábærri frammstöðu, var bæði efstur markvarða í deild og úrslitakeppni og átti stóran þátt í Íslandsmeistaratitli liðsins. Þótt hann sé aðeins 21 árs hefur hann á sæti í A-landsliðinu í fjögur ár. Jóhann tekur nú þátt í að búa til næstu kynslóð hjá SR með þjálfun markvarða í yngri flokkunum.

Friðrika hefur verið ein af stoðum í kvennaliði SR frá endurreisn þess fyrir nokkrum árum og var stigahæsti leikmaður liðsins á síðasta tímabili og leiðir einnig í stigum núna. Friðrika tók þátt í sínu fyrsta landsliðsverkefni á árinu þegar hún fór með U18 stúlkna-landsliðinu til Búlgaríu þar sem hún var með 7 stig í fimm leikjum. Hún var einnig valin í A-landslið kvenna aðeins 15 ára gömul þegar það tók þátt í Ólympíuforkeppni í Slóvakíu núna í desember.

Bæði eru Jóhann og Friðrika frábærar fyrirmyndir fyrir yngri og eldri SR-inga og vel að þessum titlum komin. Þau eru bæði ung að árum og eiga langan og farsælan feril framundan.

Við óskum þeim innilega til hamingju með titilinn.

Að auki veitti stjórn nokkrum sjálfboðaliðum viðurkenningar fyrir óeigingjörn störf í þágu félagsins á árinu. Eins og allt íþróttastarf byggist uppbygging og rekstur SR nánast alfarið á góðvild foreldra, aðstandanda og annara velunnara félagsins sem leggja til sinn tíma og vinnu.
Í ár voru það Foreldrafélag SR, Álfhildur Erla Kristjánsdóttir, Birna Björg Guðmundsdóttir, Friðjón B. Gunnarsson, Viktor  Heiðarsson og Hafsteinn Snær Þorsteinsson sem voru viðurkennd.

Andrea hefur staðið í ströngu á milli stanganna síðustu tvö tímabil þrátt fyrir ungan aldur. Hún hefur varið að meðaltali um 50 skot í leik og er samt með frábært hlutfall varðra skota, eða 85%. Andrea fór með A-landsliðinu til Englands og spilaði í undankeppni Ólympíuleikanna aðeins 15 ára gömul. Þar spreytti hún sig gegn sterkasta andstæðingi sem landsliðið hefur spilað gegn og stóð sig mjög vel. Andrea var einnig valin í U18 landsliðið sem átti að fara til Tyrklands núna í janúar

Andrea er uppalin hjá SR og einn af merkisberum öflugs barna- og unglingastarfs félagsins. Hún er ávallt jákvæð, hvetjandi og tilbúin að aðstoða alla. Andrea er frábær fyrirmynd fyrir yngri leikmenn og gefst aldrei upp þótt á móti blási.

Bjarki er hefur verið í eldlínunni í liði SR undanfarin ár og hefur getið sér gott orð fyrir dugnað og eljusemi. Hann er SR-ingur í húð og hár og missir sjaldan leikjum enda næstleikjahæsti SR-ingurinn með 165 leiki í efstu deild þrátt fyrir að vera aðeins 25 ára gamall. Bjarki hefur spilað með U18 og U20 landsliðum og verið bæði fyrirliði og aðstoðarfyrirliði. Siðustu sjö tímabil hefur hann átt fast sæti í A-landsliði Íslands.

Spilamennska Bjarka einkennist af miklum dugnaði og þeim miklu kröfum sem hann gerir til sjálfs sín. Hann er frábær fyrirmynd fyrir yngri leikmenn og gefst aldrei upp þótt móti blási.
Bjarki var einnig valinn íshokkímaður ársins hjá Íshokkísambandi Íslands.

Vegna Covid hafa Hertz-deildir og heimsmeistaramót að miklu leyti farið forgörðum í ár. Þá er tækifæri til að horfa inn á við við val á íshokkífólki ársins og skoða hverjir hafa verið í framlínunni í uppbyggingarstarfi okkar. Þar stóðu uppi tveir mjög afgerandi valkostir, Milos og Alexandra,  leikmenn, þjálfarar, landsliðsfólk og frábærar fyrirmyndir í alla staði. Bæði hafa þau staðið með SR í gegnum þykkt og þunnt.

Alexandra, sem er lykilleikmaður í kvennaliði SR, byrjaði að þjálfa hjá okkur fyrir tæpum þremur árum og lét strax til sín taka. Ásamt því að þjálfa í yngri flokkunum hefur hún leitt uppbyggingu kvennastarfs með metnaði, jákvæðni og drifkrafti. Frá því að teknar voru upp sérstakar stelpuæfingar undir hennar stjórn hefur okkur tekist að fjórfalda fjölda stúlkna hjá félaginu, úr 8 haustið 2018 upp í 40 nú á þessu ári. Alexandra spilaði með kvennalandsliðinu á HM í febrúar síðastliðnum sem gerði sér lítið fyrir og sótti silfur. Ásamt því að þjálfa hjá félaginu, spila með tveimur flokkum og landsliðinu, klára alla almenna þjálfaramenntun sem í boði er hjá ÍSÍ, dúxaði hún líka í Flensborgarskóla í desember 2019. Hún stundar nú krefjandi nám við HÍ samhliða því að þjálfa og spila hjá SR.

Milos, sem hefur verið lykilleikmaður í karlaliði SR undanfarin ár, byrjaði þjálfaraferil sinn fyrir einungis fimm árum þegar honum var falinn einn flokkur hjá SR og sinnti því verkefni mjög vel. Fyrir þremur árum var hann svo ráðinn yfirþjálfari allra yngri flokka SR. Síðan þá hefur starfið hjá félaginu tekið stakkaskiptum – iðkendum yngri flokka hefur fjölgað um meira en 90% og gæði þjálfunar hafa tekið miklum framförum. Hann hefur sökkt sér ofan í þjálfarstarfið af miklum eldmóð og drukkið í sig alla þá þekkingu sem hann hefur komist yfir. Hann nær frábærum tengslum við krakkana á ísnum og nær því allra besta úr þeim. Honum hefur líka verið falið starf aðalþjálfara U18 landsliðsins og aðstoðaðarþjálfara í landsliði U20 sem unnu einmitt gull í sinni deild á HM í janúar síðastliðnum. Milos er einnig frábær fyrirmynd utan íssins, drekkur ekki áfengi, er mikið snyrtimenni, sinnir reglulegri líkamsrækt og hefur mikla ástríðu og gleði fyrir því sem hann er að gera.

Til hamingju Alexandra og Milos!