Meistaraflokkur kvenna – Skautafélag Reykjavíkur

Aðalfundur íshokkídeildar Skautafélags Reykjavíkur

admin — Tue, 15 May 2018 12:54:58 +0000

Boðað er hér með til Aðalfundar íshokkídeildar Skautafélags Reykjavíkur. Á dagskrá eru venjulega aðalfundarstörf.

Þeir sem hafa hug á að bjóða sig fram til stjórnarstarfa vinsamlegast gefið ykkur fram eða hafið samband við núverandi stjórnarfólk.

Hægt er að skoða lög félagsins hér á vefnum.

Aðalfundur íshokkídeildarinnar verður haldinn í félagsaðstöðu Skautafélagsins í Skautahöllinni í Laugardal kl.20:00, mánudaginn 28. maí 2018.

Félagsmenn eru hvattir til að mæta og taka þátt í aðalfundarstörfum.

Stjórn íshokkídeildar

Ársmiðar á íshokkíleiki komnir í sölu

admin — Thu, 05 Oct 2017 23:21:23 +0000

Ársmiðar á íshokkíleiki Skautafélagsins eru komnir í sölu í vefverslun félagsins. Miðarnir koma í tveimur “stærðum”. Annarsvegar er um að ræða Ársmiða sem er á kr.10.000 og síðan er Lúxusársmiði sem er á kr.15.000 og gildir sá miði á alla heimaleiki SR í Laugardal og alla útileiki SR í Egilshöll. Þetta er frábær leið til að styrja íshokkídeildina og næla sér í miða á nær alla leiki SR í Reykjavík.

Alexandra spilar fyrir Nitro Xpress í vetur

admin — Thu, 21 Sep 2017 20:02:13 +0000

Alexandra Hafsteinsdóttir, leikmaður SR í 2. flokki og í Meistaraflokki kvenna, mun æfa og spila með Nitro Xpress, sem er lið Kimberley Academy, í Kanada í vetur. Í sumar opnaðist sá möguleiki fyrir hana að fara út og reyna fyrir sér í U19 ára liði Xpress. Eftir nokkrar tölvupóstsendingar og pappírsvinnu hélt Alexandra út til Kanada í lok ágúst. Þar mun hún vera við nám og æfa íshokkí í vetur. Við munum að sjálfsögðu segja meira frá hennar ævintýri í vetur.

Hægt er að fylgjast með liðinu á Facebook.

Hér að neðan er hægt að sjá skautaæfingu hjá Nitro Xpress og Alexöndru bregður fyrir með hvítan hjálm þegar það eru liðnar ca 13 sek inn í myndbandið hér að neðan.

Sameinað lið í Meistaraflokki kvenna!

admin — Thu, 07 Sep 2017 22:39:45 +0000

Nú fyrir skemmstu var kynntur til sögunnar þjálarar sameinaðs liðs SR og Bjarnarins í Meistaraflokki kvenna, Alexander Medvedev og Andri Freyr Magnússon. Sameining þessara liða hefur verið í umræðunni síðan í vor eftir að Hertz-deild kvenna með yfirburðarsigri norðan liðanna. Kvennaíshokkí hefur átt undir högg að sækja í Reykjavík og er vonast til þess að sameining liðanna í þessum flokki efli og styrki kvennastarf félaganna, SR og Bjarnarins, í framtíðinni.

Þjálfarinn, Alexander, ætti að vera hokkífólki kunnugur þar sem hann hefur spilað og þjálfað hjá Birninum síðustu tvö tímabil. Hann er nú þegar potturinn og pannan í þjálfun hjá Birninum og honum fannst þetta verkefni, sem bæði SR og Björninn sameinuðust um að gera, bæði áhugavert og krefjandi. Aðstoðarþjálfarann þarf nú ekki að kynna hér á skautafelag.is þar sem flest allir ættu að þekkja hann frá störfum hans í Skautaskólanum og víðar hjá SR. Andri hefur þjálfað hjá SR um árabil með góðum árganri. Hann verður Alexander innan handar í vetur hjá Sameinaða kvennaliðinu.

Heimavöllur þessa liðs er bæði í Laugardal og í Egilshöll. Æfingar fara eins fram á báðum stöðum.

Við hjá íshokkídeild Skautafélags Reykjavíkur munum að sjálfsögðu styðja vel við bakið á okkar stelpum í komandi leikum í Hertz-deild kvenna.

Fyrsti leikur sameinaðs kvennaliðs verður næstkomandi laugardag kl.16:20 í Egilshöll og við hverjum alla SR-inga og áhugafólk um íshokkí að fjölmenna í Egilshöll og hverja okkar stelpur til dáða.

Leikur í kvöld og um helgina!

admin — Tue, 05 Sep 2017 10:13:25 +0000

Í kvöld mun 2.flokkur SR skunda upp í Egilshöll og spila fyrsta leik tímabilsins í öðrum flokki. 2.flokkur er búinn að vera í stífum æfingum hjá Kára Guðlaugssyni og lýtur hópurinn bara nokkuð vel út. Leikurinn hefst kl.19:45, stundvísalega. Allir félagsmenn eru hvattir til að mæta í Egilshöll og hvetja strákana áfram.

Um næstu helgi verður töluverður handagangur í öskunni þar sem það verða alls 3 leikir hjá SR. Föstudaginn mætir SR Esju í Laugardalnum kl.19:45, RVK-stúlkur mæta SA Ynjum í Egilshöll kl.16:30 og kl.18:00 á laugardeginum 9. sept mun SR taka á móti SA Jötnum í Skautahöllinni í Laugardal kl.18:00.

Allir félagsmenn eru hvattir til að skella sér á þessa leiki og hvetja okkar fólk áfram!

Tímabilið er hafið – allir á ísinn!

admin — Wed, 23 Aug 2017 15:49:34 +0000

Kæru SRingar og aðrir.

Nú er tímabilið að hefjast og fyrstu æfingar, samkvæmt auglýstri æfingatöflu, byrjuðu í þessari viku.

Geymsla fyrir búnað
Í ár munum við taka upp nýtt fyrirkomulag á geymsluplássi fyrir búnað iðkenda. Útbúin verður lokuð geymsla þar sem í boði verður að leigja pláss á kr. 8000 fyrir árið. Kassi fyrir búnaðinn er innifalinn í verðinu. Við skráningu iðkanda í félagaskráningarkerfi verður hægt að haka við leigu á kassa og greiða kassagjaldið samhliða æfingagjöldum. Iðkandi kemur svo með kvittun (útprentaða eða í síma) úr kerfinu og fær afhentan merktan kassa á næstu æfingu. Einnig er hægt að greiða fyrir kassann í vefverslun SR og framvísa kvittun þaðan.

Leigubúnaður
SR bíður upp á leigu á hlífðarbúnaði fyrir iðkendur sem eru að stíga sín fyrstu skref á svellinu. Búnaðarleigan hjá SR er hugsuð til þess að ekki þurfi að fjárfesta í öllum búnaði strax. Leiga á búnaðarpakkanum er kr. 4000 fyrir önnina (kr. 8000 árið) og munu þjálfarar og fulltrúar foreldrafélags aðstoða við að finna réttan búnað á fyrstu æfingum vetrarins.

Skautaskólinn byrjar formlega 3. september. Foreldrafélagið verður með fulltrúa á staðnum bæði til að aðstoða þjálfara við að gera alla klára á ísinn en einnig til að spjalla við nýja foreldra og kynna fyrir þeim félagið og starfið okkar.

Svo minnum við á að það kostar ekkert að prófa íshokkí í Skautaskólanum svo endilega bjóðið vinum og vandamönnum að koma og prófa þessa frábæru íþrótt.

Þjálfarar og foreldrafélagið

Meistraflokkur kvenna lokið keppni

admin — Fri, 24 Feb 2017 23:52:52 +0000

Meistaraflokkur kvenna hjá SR hefur lokið keppni þetta tímabilið með alls 2 stig eftir sína leiki. Ljóst er að Ásynjur og Ynjur hjá Akureyri leika til úrslita þetta árið þar sem þær telfdu fram tveimur liðum í Íslandsmóti í ár. Kvennastarf SA er til mikilla fyrirmyndar og eru þær stúlkur sem þar æfa gríðarstekar á svellinu og erfiðar að eiga við og okkar stúlkur fundu vel fyrir því í síðustu leikjunum. Vonir standa til að breytingar verði á starfi kvennaflokksins hjá SR á næsta tímabili sem muni efla kvennastarfið hjá SR, í Reykjavík og þar með landinu öllu um ókomin ár. Myndin er tekin í síðasta leik SR-kvenna á móti Ynjum þriðjudaginn 21. febrúar.

Tvíhöfði hjá stelpunum næstu helgi – Leiðréttir tímar!!

admin — Thu, 16 Feb 2017 00:20:46 +0000

Næstkomandi helgi, 18. og 19. febrúar munu SR-stelpur taka á móti Ásynjum frá Akureyri. Leikirnir verða spilaðir í Skautahöllinni í Laugardal og hefjast þeir kl.18:45 (laugardagskvöld) og kl.08:00 (sunnudagsmorgun). Það verður við ramman reip að draga í þessum leikjum enda tróna Ásynjur á toppi deildarinnar og nokkuð ljóst að þær munu etja kappi við systurlið sitt Ynjur í úrslitakeppninni. Lið SR hefur orðið fyrir verulegri blóðtöku undanfarin misseri þar margir leikmenn eru annaðhvort meiddir, sumir mjög illa, eða veikindi eru að hrjá mannskapinn.

SR ætlar samt að taka á þessu og spila þennan leik undirmannað en með baráttuviljann að vopni og ætla að taka á móti Ásynjum af bestu getu.

Fyrri leikurinn hefst kl.18:45 á laugardagskvöldið og seinni leikurinn hefst kl.08:00 á sunnudagsmorguninn.

Uppfærð æfingatafla hjá íshokkídeild – UPPFÆRT

Eggert Steinsen — Tue, 24 Jan 2017 23:32:53 +0000

Nú á dögunum settist stjórn og þjálfarar íshokkídeildar niður og endurskoðuðu æfingatöflu deildarinnar fyrir veturinn. Það var niðurstaða þess fundar að æskilegra væri að lengja hverja æfingu hjá unglingaflokkum og meistaraflokkum heldur en að fjölga þeim skiptum sem þessir flokkar eru að mæta til æfinga niður í Skautahöllina í Laugardal. Einnig kemur þetta af því að mikill fjöldi æfinga fellur niður vegna keppni í öllum flokkum og var það mat fundarins að með þessu móti næðist betri nýting á þeim ístíma sem deildin hefur til umráða. Hægt er að nálgast æfingatöfluna í PDF-formi hér. Þessi stundatafla er birt með þeim fyrirvara að hún gæti tekið minniháttarbreytingum á næstu dögum. Nánari upplýsingar veitir stjórn íshokkídeilar og þjálfarar flokkanna á æfingatíma. Þessi æfingatafla tekur gildi frá og með sunnudeginum 29. janúar

Tveggja marka tap SR gegn Birninum

Birkir — Fri, 09 Dec 2016 14:00:19 +0000

Þriðjudaginn 6. desember mættu stelpurnar okkar Birninum í annað skiptið í vetur. Fyrir leikinn voru SR sigurstranglegra liðið, með fleiri stig í deildinni og á ágætis flugi. Áhorfendur voru á því að þær hefðu átt að vinna leikinn, því færin og skotin voru mörg. En allt kom fyrir ekki. Björninn verndaði forystu sína og fór með öll stigin yfir í Grafarvoginn.

Álfheiður Sigmarsdóttir skóf ekki af hlutinum eftir leik og taldi sjálfa sig m.a. ábyrga. Hún segir lið sitt nánast ekki hafa verið til staðar helming fyrsta leikhlutar. “Þetta voru mörk sem hefði verið auðvelt að koma í veg fyrir, bæði fyrir varnarmennina og mig, en svona gerist þegar maður nær sér ekki andlega inní leikinn frá fyrstu sekúndu.”

Bæði mörk Bjarnarins komu einmitt í fyrsta leikhluta. Alexandra Hafsteinsdóttir tekur undir með markmanni sínum. “Við vorum bara ekki alveg vaknaðar epa komnar i gírinn.” Hún sagði þó að þessi skellur hafi vakið þær og í kjölfarið hafi þær bæði sótt og varist betur.

Jóhanna Bárðardóttir vill einnig meina að liðið hafi verið óvenju lengi í gang, og að óheppni hefði að hluta spilað inn í örlögin. “Eftir annað markið varð leikurinn mjög jafn og spennandi.”

Að hennar mati barðist SR vel og komst í mörg góð færi en pökkurinn vildi ekki inn. “Það er samt alveg á hreinu að við fundum fyrir því að okkur vantaði nokkra sterka leikmenn í liðið frá því við mættum Bjarnarstelpum síðast.” Erla Jóhannesdóttir var sama sinnis. Að hennar mati var SR ekki lakari aðilinn í leiknum. “Við náðum bara ekki að nýta færin sem við fengum og koma pekkinum í netið.”

“Tvo seinni leikhlutana vorum við þó mættar og áttum nokkur góð skot á mark, en það var bara því miður ekki nóg til þess að ná okkur uppúr gryfjunni sem við grófum okkur í byrjun leiks,” segir Álfheiður.“Við höldum áfram að byggja upp liðið og mætum öflugar í næsta leik,” sagði Jóhanna að lokum.

Það er löngu orðið ljóst að það er ómögulegt að berja niður andann og spilagleði SR-kvenna og verður gaman að sjá þær galvaskar í næsta leik. Áfram SR!