Akureyri – Skautafélag Reykjavíkur

U14 gerði góða ferð til Akureyrar!

admin — Tue, 13 Nov 2018 16:17:25 +0000

Um nýliðna helgi fór U14 lið SR (4.flokkur) til Akureyrar að taka þátt í einu af Íslandsmótunum sem haldin eru fyrir þennan aldurshóp. Að vanda var gist í Skjaldarvík þar sem SR-ingar hafa gert sig heimkomna þar nyrðra. Lið SR var mjög ungt eða leikmenn á aldrinum 10 til 13 ára og var því við ofurefli að etja gegn SA og Birninum sem voru með eldri og reyndari leikmenn. En með nýjum þjálfara, Petr Kubos, og mikilli elju náðu strákarnir ásættanlegum úrslitum miðað við „aldur og fyrri störf“. Framtíðin er greinileg björt hjá þessum ungu leikmönnum og verður spennandi að fylgjast með þeim í framtíðinni.

Æfingar falla niður föstudag og sunnudag vegna móta

admin — Wed, 24 Jan 2018 21:23:15 +0000

Það hefur eflaust ekki farið fram hjá neinum að Reykjavík International Games verður haldið núna um næstkomandi helgi. Ein af keppnisgreinum mótsins er listhlaup á skautum og verður sá hluti mótsins haldinn á okkar heimavelli, Skautahöllinni í Laugardal. Einnig á sama tíma verða 5,6 og 7.flokkur íshokkídeildarinnar á Frost-mótinu á Akureyri. Þetta þýðir að það verða engar æfingar hjá íshokkídeildinni dagana 25. til og með 28. janúar. Einnig er hægt að fylgjast með á Facebook-Upplýsingasíðu yngri flokka íshokkídeildarinnar fyrir frekari upplýsingar.

Ungir SR-ingar á Greifamóti

admin — Tue, 17 Oct 2017 01:07:19 +0000

Um nýliðna helgi fór hópur af ungum SR-ingum, í 5., 6. og 7.flokki og foreldrar, til Akureyrar að taka þátt í árlegu Greifamóti Skautafélags Akureyrar. Mótið var hin besta skemmtun og ekki spillti gleðinni frábært veður á laugar og sunnudeginum. Einsog hefð er fyrir voru allir sigurvegarar á þessu móti og var mótinu slúttað með veglegri pizza-veislu og verðlaunapeningaafhendingu. Hokkídeild SR sem og foreldrafélag íshokkídeildar þakkar Skautafélagi Akureyrar fyrir skemmtilegt mót og Skautafélagi Bjarnarins fyrir skemmtilega leiki og skemmtilega samveru um liðna helgi.

Akureyrarferð yngriflokka íshokkí

Bjarni Helgason — Wed, 27 Sep 2017 09:01:17 +0000

Hin frábæra Akureyrarferð yngri flokka íshokkídeildar SR nálgast óðfluga. Skráning stendur yfir og henni lýkur í þessari viku.

Skráning hér: https://goo.gl/forms/lFvuoA1KVgn6XYCt2

– Ferðin er fyrir 5. 6. 7. flokk og skautaskóla
 - Brottför kl. 13:00, föstudaginn 13. október 2017 frá Laugardal.
– Hamborgari og pizza á Blönduósi á leiðinni til og frá Akureyri
– Gisting og matur í Skjaldarvík á meðan dvöl stendur
– Vasaljósagönguferð og kvöldvaka á kvöldin
 - Spilað íshokkí á móti Birninum og SA á laugardag og sunnudagsmorgun
– Pizza og verðlaunapeningur fyrir þáttakendur í lok móts
– Heimkoma áætluð kl. 19:00 sunnudaginn 15. október

Því miður er ekki hægt að gefa upp endanlegt verð fyrr en fjöldi skráninga liggur fyrir. Síðasta ferð kostaði um 22.000 kr. á mann. Innifalið í verði er rúta, matur á Blönduósi á leiðinni, gisting og matur í Skjaldarvík og mótsgjald.

Ekki er hægt að kaupa hluta ferðar (bara gistingu eða bara rútu) nema sérstakar ástæður liggi að baki. Þetta er liðsferð og tilgangurinn er að efla liðsandann – það gerum við með því að ferðast saman, gista saman, borða saman, spila saman og skemmta okkur saman.

1-2 foreldrar verða fararstjórar og hafa ásamt þjálfurum auga með þeim börnum sem koma foreldralausir.

Skráningu lýkur fimmtudaginn 28. september.  Aðeins skráðir iðkendur SR geta farið í ferðina. Skrá iðkendur í félagið hér: https://skautafelag.felog.is/

Nánari upplýsingar og endanlegt verð koma inn þegar fjöldi skráninga liggur fyrir – 29. september.

Þessar ferðir hafa verið frábærlega vel heppnaðar. Krakkarnir hafa skemmt sér konunglega innan sem utan íssins og kynnast vel. Þau fá að leika íshokkístjörnur eina helgi, gista á flottu hóteli með baðsloppum og heitum potti – þar sem foreldrar stjana við þau. Vonandi sjá sem flestir sér fært að koma með.

Áfram SR!

SR TILBÚNAR Í TOPPLIÐ DEILDARINNAR ÞRÁTT FYRIR MEIÐSL

Birkir — Thu, 17 Nov 2016 22:02:29 +0000

SR-stelpur hafa farið mikinn að undanförnu. Þó svo að toppur deildarinnar sé ekki þeirra, þá eru þær „inn í“ öllum leikjum sem spilaðir eru, eins og sagt er, og svo er stemningin í liðinu fádæma góð og nýjir, ungir spilarar hafa mikinn áhuga á að vera í þessu liði. Það er því ekki ofsögum sagt að framtíðin sé björt hjá meistaraflokki kvenna. En einbeitum okkur að næsta leik liðsins.

Laugardaginn næstkomandi fara stelpurnar okkar í bílferð til Akureyrar og mæta þar erfiðasta liði deildarinnar. SR hefur mætt Ynjum tvisvar sem af er vetri. Fyrri leiknum töpuðu þær með naumindum. Nánar tiltekið með einu marki. Annan leik liðanna unnu Ynjur auðveldlega.

„Við þurfum að leggja okkur allar fram til að standa vel í þeim,“ segir Jóhanna Bárðardóttir, sem spilar á vængnum. Hún segir keppikefli fyrir liðið að hver leikmaður spili þá stöðu sem lagt er upp með. Hún leggur áherslu á að vörnin spili þétt og að þær „taki skotin af“ Ynjum.

Alexöndru Hafsteinsdóttur lýst vel á leikinn og hefur trú á sínu liði. „Ynjurnar eru virkilega sterkar en ef við erum með hausinn á réttum ættum við að geta unnið.“ Eitthvað er um meiðsl í liði SR og nokkrar úr leikmannahópnum spila ekki fyrir norðan. Alexandra segir þjálfarana munu svara þessu með að raða rétt upp. „Ég hef fulla trú á að þetta muni líta eins vel út og hægt er,“ sagði Alexandra að lokum, löðrandi sannfærð í SR-anda, að vanda.

Staðan í Hertz-deild kvenna er þannig að Ynjur eru á toppnum. Ásynjur eru í öðru sæti, SR í því þriðja og Björninn rekur lestina. Jóhanna Bárðar hefur skorað eitt mark, Alexandra er með eitt mark og eina stoðsendingu. Atkvæðamest SR-inga er Brynhildur Hjaltested með tvö mörk og þrjár stoðsendingar.