Það eru margir bjartir punktar í spilum SR þessa dagana. Byrjum á nýjum þjálfara. Richard Tahtinen er aðalþjálfari liðsins og SR-ingum að góðu kunnur. Nú er hann kominn aftur.

Þú, verandi SR í gegn, getur sagt okkur frá því hvað hann er að koma með inn í liðið, samanborið við fyrri þjálfara. Hvernig lýst ykkur á kallinn?

“Flestir í liðinu þekktu Richard áður enn hann hóf störf í sumar, hann þjálfaði marga okkar þegar við vorum yngri og þekkir okkur sem leikmenn. Ég held að flestir hafi verið sáttir með að heyra að hann myndi þjálfa okkur í vetur í stað Bandaríkjamannsins sem ætlaði að koma. Bæði vegna þess að það þekkti engin til hans en allir þekkja Richard og kunna að meta hann sem þjálfara.”

Fljótt á litið virðist SR vera með yngsta liðið í deildinni í ár og þjálfarinn notar mikið yngstu strákana. Hver er þín tilfinning fyrir þessum nýja kjarna? Hvað einkennir þá og er öðruvísi í samanburði við elstu kempur liðsins?

“Ungt lið býður upp á bjarta framtíð. Ungir og efnilegir strákar eru að fá að spila, safna reynslu og bæta sig. Reynsluboltarnir spila auðvitað stórt hlutverk í leik liðsins og við að byggja upp yngri leikmenn. Ég er mjög jákvæður fyrir þessu og það er góður andi í liðinu.”

Eins og áður segir þá eru ljósir punktar, t.d. ungur mölli sem verður brátt reiðubúinn í að bítast um krúnuna við Ævar markmann. En eitthvað segir mér að þú sért ekki ánægður með stigafjöldan sem af er? Hvað þarf SR að gera til að stoppa lekann og klára leiki?

“Arnar, oft kallaður kötturinn, hefur margsannað hvað hann er hraður og sterkur markmaður og það verður vissulega hart barist um markvarðarstöðuna á þessu og komandi tímabilum. Við erum búnir að fá mikið af mörkum á okkur í síðustu leikjum en ég held að það sé lítið hægt að kenna markmönnunum um það heldur meira varnarleik liðsins í heild sinni. Það er auðvitað eitthvað sem við erum að tala um, æfa og bæta.”

Fyrir lesendur sem þekkja ekki til, getur þú tilgreint erlenda leikmenn sem eru hjá okkur þátt þeirra í leik liðsins?

“Milos Racanský er frá Tékklandi og þetta er fjórða tímabilið hans hjá SR. Hann er virkilega hraður og skemmtilegur leikmaður.  Robbie Sigurðsson (aðstoðarfyrirliði) er hálfur Íslendingur sem ólst upp í Ameríku. Hann er núna að spila þriðja tímabilið sitt í röð fyrir SR og er tekknískur og góður “playmaker”.  Jan Kilibár er frá Tékklandi. Hann er mikilvæg viðbót við liðið sem stór og sterkur varnarmaður.  Oldrich Herman (“Bakarinn”) er einnig frá Tékklandi. Hann kom til landsins til að vinna sem bakari og ákvað koma og spila fyrir SR. Hann er reynslumikill og góður leikmaður.  Josh Popsie er Ameríkani sem kom til landsins sem starfsmaður IcelandAir. Hann er búinn að vera æfa með okkur sem markmaður og vera á bekknum í leikjum, Rikka til aðstoðar.”

Hvaða lið er SR erfiðast og hvaða leikmann finnst þér skemmtilegast að eiga við?

“Það er erfitt að svara þessari spurningu. Mikill munur er á okkur eins og hinum liðunum á milli leikja og lítið er búið af tímabilinu. Stærsta tapið okkar var gegn Birninum en vonandi snýst það við þegar líður á tímabilið. Ætli mér persónulega finnist ekki skemmtilegast að kljást við gömlu SR-ingana í Esjunni.”

Tímabilið 2013 til 2014 var eftirminnilegt.

“Það tímabil byrjaði nú ekkert alltof vel frekar en þetta en við héldum áfram og bættum okkur. Þa vorum við líka með eldra lið og sterka útlendinga í vörninni. Það small bara allt saman seinni part tímabils.”

Úrslitarimman núna verður…?

“Skautafélag Reykjavíkur gegn UMFK Esja.”

“ÞETTA ER ÞAÐ SKEMMTILEGASTA SEM ÉG GERI OG TEKUR HUGANN AF ÖLLU ÖÐRU SEM ER Í GANGI Í LÍFINU”

Til hamingju með valið! Áttir þú von á þessu og hvernig líður þér?

Alexandra: Takk fyrir! En jú ég átti alveg von á þessu þar sem ég var í æfingarhópnum fram að lokavalinu á síðasta tímabili, þannig að ég rétt komst ekki inn í landsliðið, en ég er bara spennt fyrir þessu!

Álfheiður: Takk fyrir það. Nei, ég þorði nú ekki að búast við því en vonaði alltaf.

Hefur það lengi verið takmark þitt að komast í þennan hóp og hvernig hefur þín leið legið í hann?

Alexandra: Í rauninni ekki, þar sem ég hef alltaf bara spilað hokkí og reynt ad bæta mig fyrir sjálfa mig og liðið mitt, því þetta er það skemmtilegasta sem ég geri og tekur hugann af öllu öðru sem er í gangi í lífinu. En ég eiginlega veit ekkert hvernig ég endaði upp í æfingarcampinu í fyrsta lagi þar sem ég fékk bara skilaboð frá einum þjálfaranun allt í einu í hitt í fyrra.

Álfheiður: Hefur langað að vera með frá því ég var smástelpa, þó að þegar ég var yngri hafi ég ekki búist við því að vera að gera það í markmannsbúning. Ég er búin að vera í hokkýi síðan ég var ellefu ára, með langri pásu því ég flutti utanlands þar sem var lítið um kvennalið. Byrjaði eftir það í marki og finnst mér ég alveg vera í mínu elementi þar.

Getur þú lýst undirbúningi þínum sem hokkíleikmanns bæði fyrir deildarleiki og landsliðið?

Alexandra: Ég reyni bara að mæta á allar æfingar og gera mitt besta á æfingum alveg eins og í leikjum, gera eins og þjálfarinn segir, reyna að fá nægan svefn og borða nægan mat, og hollan, alltaf þegar ég get, og ef ég þarf að læra daginn sem ég er að keppa segi ég bara fokk it, hokkí skiptir meira máli.

Álfheiður: Gameday hjá mér snýst aðallega um að reyna að halda stressinu í lágmarki, muna að borða og drekka nóg vatn. Allt annað kemur á sjálfu sér.

Hvernig lýst þér á veturinn hjá SR?

Alexandra: Við í kvennaliðinu höfum náð að bæta okkur alveg ótrúlega mikið bæði sem lið og sem einstaklingar. Við höfum alltaf verið lélegasta liðið í deildinni en aldrei látið það draga okkur niður og reynt að bæta okkur eins og við getum og núna erum við loksins að sjá árangurinn erfiðis okkar. Við unnum fyrsta leikinn okkar gegn Birninum í gær. Ég sé ekki fram á annað en rosalega spennandi tímabil.

Álfheiður: Bara mjög vel, þetta er besta byrjun á tímabili hjá kvennaliðinu sem ég hef upplifað, við erum með margmennt og sterkt lið sem ég hlakka til að fá að sjá hvað getur saman.

Eitthvað sem þú vilt segja að lokum til ungs fólks sem er að byrja í hokkí eða að hugsa um að prófa?

Alexandra: Setjið ykkur markmið og ekki gefast upp, ekki þótt þú sért eina stelpan í liðinu eða ef þú ert að æfa niður fyrir þig, því að á endanum mun allt borga sig! Og til þeirra sem vilja byrja að æfa: ekki gefast upp og beila eftir fyrstu prufu bara vegna þess að þú stóðst ekki í lappirnar í fyrsta skiptið á skautunum. Allir bestu leikmennirnir byrjuðu á nákvæmlega sama stað. Þetta tekur tíma en kemur á endanum, og þá geturu ekki hugsað þér lífið án íshokkís.

Álfheiður: Einfaldlega að þið munið ekki sjá eftir því. Það eru til fáar betri tilfinningar en að vera hluti af liðsheild, hvað þá í svona ótrúlega skemmtilegri íþrótt sem hokkýið er.