þjálfarar – Skautafélag Reykjavíkur

U14 gerði góða ferð til Akureyrar!

admin — Tue, 13 Nov 2018 16:17:25 +0000

Um nýliðna helgi fór U14 lið SR (4.flokkur) til Akureyrar að taka þátt í einu af Íslandsmótunum sem haldin eru fyrir þennan aldurshóp. Að vanda var gist í Skjaldarvík þar sem SR-ingar hafa gert sig heimkomna þar nyrðra. Lið SR var mjög ungt eða leikmenn á aldrinum 10 til 13 ára og var því við ofurefli að etja gegn SA og Birninum sem voru með eldri og reyndari leikmenn. En með nýjum þjálfara, Petr Kubos, og mikilli elju náðu strákarnir ásættanlegum úrslitum miðað við “aldur og fyrri störf”. Framtíðin er greinileg björt hjá þessum ungu leikmönnum og verður spennandi að fylgjast með þeim í framtíðinni.

Ungir SR-ingar á Greifamóti

admin — Tue, 17 Oct 2017 01:07:19 +0000

Um nýliðna helgi fór hópur af ungum SR-ingum, í 5., 6. og 7.flokki og foreldrar, til Akureyrar að taka þátt í árlegu Greifamóti Skautafélags Akureyrar. Mótið var hin besta skemmtun og ekki spillti gleðinni frábært veður á laugar og sunnudeginum. Einsog hefð er fyrir voru allir sigurvegarar á þessu móti og var mótinu slúttað með veglegri pizza-veislu og verðlaunapeningaafhendingu. Hokkídeild SR sem og foreldrafélag íshokkídeildar þakkar Skautafélagi Akureyrar fyrir skemmtilegt mót og Skautafélagi Bjarnarins fyrir skemmtilega leiki og skemmtilega samveru um liðna helgi.

Sameinað lið í Meistaraflokki kvenna!

admin — Thu, 07 Sep 2017 22:39:45 +0000

Nú fyrir skemmstu var kynntur til sögunnar þjálarar sameinaðs liðs SR og Bjarnarins í Meistaraflokki kvenna, Alexander Medvedev og Andri Freyr Magnússon. Sameining þessara liða hefur verið í umræðunni síðan í vor eftir að Hertz-deild kvenna með yfirburðarsigri norðan liðanna. Kvennaíshokkí hefur átt undir högg að sækja í Reykjavík og er vonast til þess að sameining liðanna í þessum flokki efli og styrki kvennastarf félaganna, SR og Bjarnarins, í framtíðinni.

Þjálfarinn, Alexander, ætti að vera hokkífólki kunnugur þar sem hann hefur spilað og þjálfað hjá Birninum síðustu tvö tímabil. Hann er nú þegar potturinn og pannan í þjálfun hjá Birninum og honum fannst þetta verkefni, sem bæði SR og Björninn sameinuðust um að gera, bæði áhugavert og krefjandi. Aðstoðarþjálfarann þarf nú ekki að kynna hér á skautafelag.is þar sem flest allir ættu að þekkja hann frá störfum hans í Skautaskólanum og víðar hjá SR. Andri hefur þjálfað hjá SR um árabil með góðum árganri. Hann verður Alexander innan handar í vetur hjá Sameinaða kvennaliðinu.

Heimavöllur þessa liðs er bæði í Laugardal og í Egilshöll. Æfingar fara eins fram á báðum stöðum.

Við hjá íshokkídeild Skautafélags Reykjavíkur munum að sjálfsögðu styðja vel við bakið á okkar stelpum í komandi leikum í Hertz-deild kvenna.

Fyrsti leikur sameinaðs kvennaliðs verður næstkomandi laugardag kl.16:20 í Egilshöll og við hverjum alla SR-inga og áhugafólk um íshokkí að fjölmenna í Egilshöll og hverja okkar stelpur til dáða.

Tímabilið er hafið – allir á ísinn!

admin — Wed, 23 Aug 2017 15:49:34 +0000

Kæru SRingar og aðrir.

Nú er tímabilið að hefjast og fyrstu æfingar, samkvæmt auglýstri æfingatöflu, byrjuðu í þessari viku.

Geymsla fyrir búnað
Í ár munum við taka upp nýtt fyrirkomulag á geymsluplássi fyrir búnað iðkenda. Útbúin verður lokuð geymsla þar sem í boði verður að leigja pláss á kr. 8000 fyrir árið. Kassi fyrir búnaðinn er innifalinn í verðinu. Við skráningu iðkanda í félagaskráningarkerfi verður hægt að haka við leigu á kassa og greiða kassagjaldið samhliða æfingagjöldum. Iðkandi kemur svo með kvittun (útprentaða eða í síma) úr kerfinu og fær afhentan merktan kassa á næstu æfingu. Einnig er hægt að greiða fyrir kassann í vefverslun SR og framvísa kvittun þaðan.

Leigubúnaður
SR bíður upp á leigu á hlífðarbúnaði fyrir iðkendur sem eru að stíga sín fyrstu skref á svellinu. Búnaðarleigan hjá SR er hugsuð til þess að ekki þurfi að fjárfesta í öllum búnaði strax. Leiga á búnaðarpakkanum er kr. 4000 fyrir önnina (kr. 8000 árið) og munu þjálfarar og fulltrúar foreldrafélags aðstoða við að finna réttan búnað á fyrstu æfingum vetrarins.

Skautaskólinn byrjar formlega 3. september. Foreldrafélagið verður með fulltrúa á staðnum bæði til að aðstoða þjálfara við að gera alla klára á ísinn en einnig til að spjalla við nýja foreldra og kynna fyrir þeim félagið og starfið okkar.

Svo minnum við á að það kostar ekkert að prófa íshokkí í Skautaskólanum svo endilega bjóðið vinum og vandamönnum að koma og prófa þessa frábæru íþrótt.

Þjálfarar og foreldrafélagið

Stundaskrá fyrir íshokkí komin á vefinn!

admin — Thu, 17 Aug 2017 23:08:47 +0000

Nú þegar skólar eru í startholunum er ekki seinna vænna en að gera sig klára fyrir næsta íshokkítímabil. Stjórn íshokkídeildar er búin að gefa út æfingar fyrir yngri flokka félagsins sem hægt er að skoða með þessari frétt eða á þessari síðu hér. Þetta er tafla sem tekur gildir frá og með mánudeginum 21. ágúst og til áramóta hið minnsta. Einhverjar smávægilegar breytingar gætu orðið á töflunni núna í upphafi vetrar en það verður auglýst og tilkynnt hér á vefnum og einnig á Upplýsingasíðu fyrir yngri flokka SR á Facebook.

Aðstæður fyrir íshokkí á tjörnum!

admin — Sat, 04 Mar 2017 21:32:26 +0000

Aðstæður á morgun , sunnudag, og líkleg næsta mánudag verða fínar aðstæður til að skauta á tjörnum og vötnum í kringum Reykjavík! Ragnar okkar Jóhannsson ætlar að vera með mörk og pekki til að skella í skemmtilegt spil á Rauðvatni á morgun , sunnudag. fyrir alla þá sem vilja skella sér á skauta og spila smá hokkí við frábærar náttúrlegar aðstæður. Í Laugardalnum verða áfram æfingar samkvæmt stundatöflu og þar verða hressir þjálfar sem taka á móti iðkendum að vanda.

Mynd: Ragnar Ævar Jóhannsson

Uppfærð æfingatafla hjá íshokkídeild – UPPFÆRT

Eggert Steinsen — Tue, 24 Jan 2017 23:32:53 +0000

Nú á dögunum settist stjórn og þjálfarar íshokkídeildar niður og endurskoðuðu æfingatöflu deildarinnar fyrir veturinn. Það var niðurstaða þess fundar að æskilegra væri að lengja hverja æfingu hjá unglingaflokkum og meistaraflokkum heldur en að fjölga þeim skiptum sem þessir flokkar eru að mæta til æfinga niður í Skautahöllina í Laugardal. Einnig kemur þetta af því að mikill fjöldi æfinga fellur niður vegna keppni í öllum flokkum og var það mat fundarins að með þessu móti næðist betri nýting á þeim ístíma sem deildin hefur til umráða. Hægt er að nálgast æfingatöfluna í PDF-formi hér. Þessi stundatafla er birt með þeim fyrirvara að hún gæti tekið minniháttarbreytingum á næstu dögum. Nánari upplýsingar veitir stjórn íshokkídeilar og þjálfarar flokkanna á æfingatíma. Þessi æfingatafla tekur gildi frá og með sunnudeginum 29. janúar

MJÓTT Á MUNUM Á AKUREYRI

Birkir — Wed, 09 Nov 2016 13:43:10 +0000

Þrátt fyrir að SR dvelji í kjallara Hertz-deildarinnar í íshokkí um þessar mundir þá verður seint sagt um okkar menn að þeir gefi sig vonleysinu á vald. Þvert á móti. Fyrir hvern einasta leik er góður mórall í liðinu og sérstaklega fyrir Akureyraferðina í gær, þar sem allir virtust fókuseraðir á markmiðið að gera SA lífið leitt og vinna leikinn. Aðstoðarfyrirliðinn Kári Guðlaugsson sagði liðið hugsa ekki um stórt tap eftir síðasta leik við SA. Og klykkti svo út með því að segja liðið virkilega peppað fyrir viðureignina. Auðvitað!

Richard Tahtinen þjálfari tók í sama streng. “Þegar pökkurinn snertir ísinn í fyrsta skiptið í kvöld þá er allur fókusinn á þeim leik og athygli okkar berst að því sem raunverulega skiptir máli í kvöld, sem eru smáatriðin, kerfið sem við viljum spila og hvernig við högum okkur á ísnum.”

Stuttu áður en dómari ræsti leikinn sagði Bjarki Reyr fyrirliði að það væri “virkilega góð stemning í liðinu eftir hörku rútuferð. Við stefnum að sjálfsögðu á sigur!” Og úrslitin bera þess glöggt vitni. SA vann með tveimur mörkum gegn einu marki Kára Guðlaugs. Tæpara mátti það ekki standa.
SR-ingar tóku sig á í þessum leik hvað villuvandræði varðar. Svo mikið reyndar að enginn sat í skammakróknum í síðust lotunni, en samt börðust þeir hart til að jafna. Richard þjálfari hafði einmitt lagt upp með slíkan aga í huga. “Strákarnir mega ekki láta mótherja sína koma sér úr andlegu jafnvægi og enda þannig í skammakróknum vegna pirrings og skilja þá sem sem á ísnum eru eftir einum færri.” Þetta gekk svo upp.

En kraftspilsmark Andra Mikaelssonar í annari lotu hélt út leikinn. Tómas Ómarsson lék ekki með SR í þessum leik og munar um minna hvað vörnina snertir. Vonandi fáum við hann til baka sem fyrst.

Bjarki Reyr var nokkuð brattur í lok leiks og þrátt fyrir ósigursóbragð þá teldi hann tilfinninguna í liðinu góða.
“Við erum nokkuð sáttir með leikinn í heildina. Auðvitað lika fullt sem má bæta og eftir svona jafnan og skemmtilegan leik getur sigurinn alltaf endað báðum megin,” sagði fyrirliðinn keikur að lokum.

Nánar um leikinn hér
SA-SR leikur 8. nóvember 2016

Mynd: Elvar Freyr Pálsson

Kynningarfundur íshokkídeildar næsta sunnudag!

admin — Tue, 13 Sep 2016 12:31:26 +0000

Haldinn verður upplýsingafundur fyrir foreldra iðkenda íshokkídeildar SR næstkomandi sunnudag kl 13:00. Á fundinum verður farið yfir áætlanir vetrarsins, þjálfarar kynntir og spurningum svarað. Heitt kaffi verður á könnunni, vonandi sjáum við sem flesta.

Hokkístjórnin.