Íshokkí – Skautafélag Reykjavíkur

Aðalfundur aðalfélags SR 20. maí

Anna María Hedman — Tue, 05 May 2026 16:05:31 +0000

Boðað er til aðalfundar Skautafélags Reykjavíkur (aðalfélags) miðvikudaginn 20. maí kl. 20.00.
Fundurinn er haldinn í sal Skautahallarinnar í Laugardal.

Dagskrá aðalfundar samkvæmt lögum félagsins
1. Kosinn fundarstjóri og fundarritari.
2. Lesin upp fundargerð síðasta aðalfundar.
3. Lögð fram skrifleg skýrsla aðalstjórnar og skýrslur deilda.
4. Lagðir fram endurskoðaðir reikningar aðalstjórnar ásamt endurskoðuðum reikningum einstakara deilda miðaðir við almanaksárið.
5. Umræður um skýrslu og reikninga aðalstjórnar. Reikningar aðalstjórnar bornir upp til samþykktar.
6. Kosningar.
I. Kosning formanns til tveggja ára.
II. Kosning gjaldkera og ritara til eins árs.
III. Kosning tveggja varamanna í aðalstjórn til eins árs.
IV. Kosning tveggja skoðunarmanna til eins árs.
7. Lagabreytingar.
8. Önnur mál.

Á aðalfundi ræður meirihluti atkvæða úrslitum mála. Til þess að breyta lögum félagsins þarf þó tvo þriðju hluta greiddra atkvæða.

Lagabreytingartillögur skulu berast aðalstjórn minnst einni viku fyrir aðalfund. Enginn getur farið með nema eitt atkvæði á aðalfundi. Aðalfundur félagsins hefur æðsta vald í öllum málum þess.

Framboð til stjórnar skulu berast ritara stjórnar Jóhönnu Þorkelsdóttur, johannahelga@gmail.com.

Ný stjórn íshokkídeildar kosin á aðalfundi

Bjarni Helgason — Thu, 30 Apr 2026 12:04:47 +0000

Aðalfundur íshokkídeildar fór fram í gærkvöldi í sal Skautahallarinnar í Laugardal. Um 30 manns sóttu fundinn.

Lögð voru fram uppfærð lög félagsins sem voru samþykkt af fundargestum. Kristín Skjaldardóttir frá Samskiptaráðgjafa íþrótta- og æskulýðsstarfs kynnti viðbragðsáætlun við ofbeldi, einelti, slysum og öðru sem gæti komið upp innan íþróttafélags. Samþykkt var á fundinum að félagið fylgi þessari áætlun í sínum störfum, eins og ÍSÍ hefur lagt til við íþróttahreyfinguna í heild.

Ný stjórn var sjálfkjörin þar sem engin mótframboð bárust.
Friðjón B. Gunnarsson var endurkjörinn formaður.
Bjarni Helgason var endurkjörinn varaformaður.
Atli Þór Árnason var kjörinn ritari og kemur nýr í stjórn.
Guðmundur Logi Norðdahl var endurkjörinn í meistaraflokksráð karla.
Karen Eiríksdóttir var kjörin í meistaraflokksráð kvenna og kemur aftur í stjórn eftir árs hlé.
Marta Joy Hermannsdóttir var endurkjörin í barna- og unglingaráð.
Ásgerður Fjóla Friðbjarnardóttir var kjörin meðstjórnandi, var áður varamaður.
Bjarni Eyvinds Þrastarson var kjörinn meðstjórnandi, var áður varamaður.
Sigurður Jóhann Stefánsson var kjörinn meðstjórnandi, var áður varamaður.

Engin framboð bárust í hlutverk gjaldkera en stjórn hefur heimild til að skipa einstakling í það hlutverk þegar hentugur aðili finnst.

Félagið vill koma á framfæri þakklæti til fráfarandi stjórnarfólks: Elísabetar Stefánsdóttur, Benediktu Kristjánsdóttur, Pálín Helgadóttur og Ástu Særós Haraldsdóttur.

HM kvenna í Slóveníu lokið

Bjarni Helgason — Tue, 21 Apr 2026 11:16:36 +0000

Landslið Íslands endaði í 5. sæti í A riðli 2. deildar HM kvenna í Bled í Slóveníu á dögunum. Liðið byrjað frábærlega með sigri á gestgjöfunum, sem komu niður um deild, en náði sér ekki á strik eftir það. Liðið sýndi að það getur unnið góðar íshokkí-þjóðir og byggir á því sem gekk vel fyrir næsta mót að ári og lærir af því sem miður fór. Liðið endaði með fjögur stig eins og Tævan og Ástralía en óhagstæð innbyrðis úrslit ollu því að liðið endaði neðst.

Hér er samantekt úr tölfræði mótsins fyrir leikmenn félagsins. Yfirlit yfir leiki liðsins á mótinu má finna neðst í fréttinni ásamt myndum af SR-ingum á mótinu.

Teresa Snorradóttir

– 2 mörk og 1 stoðsending, önnur markahæst í liði Íslands
– 22% skotnýting, sú besta í liði Íslands
– í 2.-4 sæti yfir stigahæstu leikmenn liðsins

Friðrika Magnúsdóttir
– 1 mark og 2 stoðsendingar
– í 2.-4. sæti yfir stigahæstu leikmenn liðsins
– í 2.-3. sæti yfir stoðsendingar í liði íslands

Gunnborg Jóhannsdóttir
– 1 mark

Andrea Bachmann
– Yfir 90% hlutfall skota varin, fékk á sig 136 skot og varði 123 af þeim

Bríet Friðjónsdóttir
– +1 í +/- efst í liði Íslands
– á sínu fyrsta A-landsliðs móti

María Eiríksdóttir

– Kom aftur inn í landsliðshópinn eftir hlé

Eins og áður kom fram endaði liðið í 5. sæti en Norður-Kórea dróg sig úr keppni því aðeins 5 lið á mótinu í stað 6. Liðið fellur samt sem áður niður um deild og spilar því í B riðli 2. deildar að ári.

Í fyrsta leiknum gegn gestgjöfunum frá Slóveníu lenti liðið undir 3-0 en skoraði síðan fjögur ósvöruð mörk frá lok annars leikhluta. Sigurmarkið kom rétt fyrir leikslok. Þetta var klárlega langbesta frammistaða liðsins á mótinu. Næsti leikur var gegn Póllandi sem reyndist langsterkasta liðið í ár og tók gullið mjög örugglega. Ísland komst yfir í byrjun leiks en eftir það lá Pólland nánast í sókn það sem eftir lifði leiks og náðu að jafna strax í fyrstu lotu. Ísland varðist hetjulega og hélt leiknum jöfnum allt þar til í þriðja leikhluta þegar stíflan brast og Pólland setti þrjú mörk síðustu tíu mínútur leiksins, þarf af eitt í tómt markið. Pólland átti 49 skot á mark gegn 10 skotum Íslands. Þriðji leikur liðsins var gegn Áströlum sem reyndust sterkari en okkar konur og sigruðu nokkuð örugglega 4-1.

Síðasta leikur liðsins var því úrslitaleikur um hvort liðið, Íslands eða Tævan, myndi verma botnsætið eða hvort myndi næla sér í brons. Ísland var klárlega sterkari og sótti meira en það var hins vegar Tævan sem skoraði fyrst og var komið í 2-0 í byrjun annarrar lotu. Ísland minnkaði fljótlega muninn í 2-1. Liðin skoruðu sitthvort markið í viðbót áður en annarri lotu lauk. Ísland náði svo loks að jafna rétt fyrir leikslok með auka sóknarmanni á kostnað markmanns. Ekkert mark var skorað í framlengingu og þurfti því vítakeppni til að skera úr um úrslit. Ekki tókst Íslandi að skora í vítakeppninni en Tævan setti tvö og tók því aukastigið. Tævan, Ástralía og Ísland enduðu öll með fjögur stig en óhagstæð innbyrðis úrslit urðu til þess að Ísland endaði neðst af þeim þremur.

Greinin hefur verið uppfærð.

Kári maður mótsins og stigahæstur íslendinga

Bjarni Helgason — Wed, 15 Apr 2026 12:54:50 +0000

Eftir frábæra byrjun hjá karlalandsliðinu á HM í Búlgaríu með þremur sigrum í röð fataðist flugið á lokametrunum, tap fyrir heimamönnum og Ísrael í lokaleiknum þýddi að liðið endaði með brons.

Kári Arnarsson maður mótsins úr liði Íslands tekur við Tissot úri í verðlaun.

Liðið mun klárlega byggja á góðu gengi fyrrihluta móts og læra af síðustu tveimur leikjunum fyrir næsta tímabil og vera þar í baráttunni um gullið. Mótið fór fram í Sofiu í Búlgaríu dagana 6.–12. apríl sl.

Hér er samantekt úr tölfræði mótsins fyrir leikmenn félagsins. SR-ingar komu mjög mikið við sögu og áttu 14 af 21 marki liðsins. Yfirlit yfir leiki liðsins á mótinu má finna neðst í fréttinni ásamt myndum af SR-ingum á mótinu.

Kári Arnarsson

– Maður mótsins úr liði Íslands
– 2 mörk og 6 stoðsendingar, stigahæstur Íslendinga á mótinu og 10. stigahæstur allra
– Efstur allra á mótinu í sigrum í uppkasti, 63.22%
– +3 í +/-

Alex Sveinsson

– 3 mörk og 2 stoðsendingar
– Í 2. sæti yfir markahæstu leikmenn Íslands ásamt Hákoni og Gunnlaugi
– +4 í +/- í 12.–14 sæti allra á mótinu

Hákon Magnússon

– 3 mörk og 2 stoðsendingar
– Í 2. sæti yfir markahæstu leikmenn Íslands ásamt Alex og Gunnlaugi

Styrmir Maack

– 2 mörk og 3 stoðsendingar
– +4 í +/- í 12.–14 sæti allra á mótinu

Gunnlaugur Þorsteinsson

– Valinn maður leiksins gegn Nýja Sjálandi
– 3 mörk
– Í 2. sæti yfir markahæstu leikmenn Íslands ásamt Alexi og Hákon
– +2 í +/-

Eggert Þorgilsson

– 1 mark og 2 stoðsendingar
– +3 í +/-

Níels Hafsteinsson

– 3 stoðsendingar
– +3 í +/-

Liðið mætti Taípeí í fyrsta leik og landaði þar nokkuð örugglega 6–5 sigri þótt andstæðingarnir hafi gert heiðarlega atlögu með tveimur mörkum á síðustu mínútum leiksins. Í öðrum leik mætti liðið Nýja-Sjálandi þar sem sigurinn var aldrei í hættu, 6-2 var lokaniðurstaðan. Í þriðja leik var andstæðingurinn Kyrgistan sem veitti harða mótspyrnu en góð vörn og markvarsla tryggði annan góðan sigur, 6–3.

Þegar þar var komið við sögu var Ísland með þrjá sterka sigra í röð og sex mörk skoruð í þeim öllum. Þar sem Ísrael hafði tapað stigum í tveimur viðureignum sínum þurfti Ísland bara einn sigur í viðbót til að landa gullinu. Það reyndist þó erfiðara en að segja það.

Næst síðasti leikurinn var gegn búlgörsku gestgjöfunum sem enn voru án sigur og liðið hafði mætt og sigrað 10–2 í æfingaleik fyrir mótið. Þeir reyndust eiga sinn besta leik á mótinu og sigruðu nokkuð óvænt 3–1 en þriðja markið kom í tómt netið þegar Ísland freistaði þess að jafna með fleiri sóknarmönnum.

Það þýddi að úrslitaeinvígi yrði í lokaleiknum gegn Ísrael sem hefur oft reynst landsliðum Íslands erfiður ljár í þúfu. Það reyndist líka raunin og 5–2 tap varð staðreynd. Nýja Sjáland nýtti tækifærið og hoppaði um leið yfir Ísland í stigum og stal silfrinu. Þótt Ísrael hafi náð gulli fá þeir ekki að spila í deildinni fyrir ofan að ári þar sem henni var aflýst vegna stríðsins í Miðausturlöndum.

Aðalfundur íshokkídeildar 2026

Bjarni Helgason — Tue, 14 Apr 2026 08:53:57 +0000

Boðað er til aðalfundar Íshokkídeildar Skautafélags Reykjavíkur miðvikudaginn 29. apríl kl. 20:00 í sal Skautahallarinnar. Á fundinum verða lagðar fram tillögur stjórnar til breytinga á lögum íshokkídeildar. Hér er tengill á breytingartillögur. Gulmerkt er nýtt og yfirstrikað það sem fer út.

Samtímis er boðað til framhalds-aðalfundar sama kvöld, miðvikudaginn 29. apríl, kl. 20:30 þar sem hefðbundinni dagskrá aðalfundar verður fylgt og þá samkvæmt lögum félagsins eftir framangreindar lagabreytingar, hljóti þær samþykki félagsmanna.

Framboð til stjórnar skulu berast í síðasta lagi sunnudaginn 26. apríl til ritara stjórnar, Benediktu Kristjánsdóttur bgkristjansdottir@gmail.com

SR Íslandsmeistari kvenna 2026

Bjarni Helgason — Mon, 30 Mar 2026 00:17:41 +0000

Kvennalið SR skráði söguna í dag þegar þær sigruðu SA í fjórða leik úrslitarimmunnar og tryggðu sér þar með Íslandsmeistaratitilinn 2026. Þetta er fyrsta skiptið sem SR spilar til úrslita í íshokkí kvenna og þar að leiðandi fyrsti titillinn.

Kvennalið SR var endurvakið tímabilið 2020-2021 eftir samstarf Reykjavíkurliðanna þrjú tímabil þar á undan. Þar áður hafði verið starfandi kvennalið hjá SR frá árinu 2010 en aðeins náð að sigra einn leik á þeim tíma, árið 2016 í framlengingu. Það lagði þó grunninn að því sem síðar skyldi koma. Engin leikmaður er enn úr því liði en fjórir leikmenn sem spiluðu fyrsta tímabilið með endurvöktu kvennaliði SR 2020-2021 eru í Íslandsmeistaraliðinu í ár. Systurnar Arna og Bríet Friðjónsdóttir, Heiður Atladóttir og Friðrika Magnúsdóttir. Arna og Heiður eru líka æskuvinkonur og byrjuðu saman að æfa íshokkí. Friðrika Magnúsdóttir hafði aldur til að spila eftir áramót þetta upphafstímabil. Auk þeirra fjögurra var Andrea Bachmann í starfshópi liðsins núna en hún spilar í Svíþjóð þessi misserin.

Athyglisvert er að tveir leikmenn úr liði SR virðast hafa einstaklega gott lag á að næla sér í Íslandsmeistaratitla. Teresa Snorradóttir spilaði með Fjölni þrjú tímabil og vann titla seinni tvö en þar áður hafði hún unnið nokkra með SA. Berglind Leifsdóttir er svo með samfellda titlasögu í mörg tímabil. SR í ár, Fjölnir tvö síðustu tímabil og SA nokkur ár þar á undan – líklega 8 titlar í röð. Geri aðrir betur.

Þessi úrslit voru hnífjöfn og allir leikir sigruðust með minnsta mun og tveir fóru alla leið í framlengingu og vítakeppni.

Mörk SR í rimmunni skoruðu
– Eleonor 1 mark
– Arna 1 mark
– Gunnborg 1 mark
– Friðrika 2 vítaskot og 1 stoðsending
– Ragnhildur 1 vítaskot
– Kristína Ngoc 1 stoðsending
– Brynja Þórarinsdóttir 1 stoðsending

Það má með sanni segja að þessi úrslit hafi verið einvígi milli sterkra varna og tveggja frábærra markvarða sem báðar eru kanadískar. Julianna endaði efst með 97.37% markvörslu og Shawlee rétt rúmu prósentustigi á eftir henni. Ótrúlegar tölur sem útskýra vel af hverju svona fá mörk voru skoruð í þessari rimmu. Varnarleikur SR var tekinn upp á næsta stig í úrslitum og náði að halda sterkri sókn SA algjörlega í skefjum öll úrslitin. SA skoraði að meðaltali tæplega fjögur mörk í hverjum leik í deildinni í vetur en skoraði aðeins þrjú mörk í fjórum leikjum úrslitanna.

Julianna, að öðrum ólöstuðum, var án efa besti leikmaður úrslitarimmunnar. Hún varði öll víti frá SA nema eitt í leikjunum tveimur þar sem vítakeppni þurfti til að skera úr um úrslit.

Ljósmynd og myndband: Bjarni Helgason

SR Íslands- og deildarmeistarar 2026

Bjarni Helgason — Sat, 14 Mar 2026 23:26:05 +0000

Karlalið SR sigraði SA 3-2 á heimavelli í Skautahöllinni í Laugardal í dag og tryggði sér þannig Íslandsmeistaratitlinn 2026. Liðið vann úrslitaeinvígið 3-0.

SR varð líka deildarmeistari eftir sigur á SA í tveimur lokaleikjum Topp-deildarinnar.

SR sigraði 6 síðustu leiki sína gegn SA í deild og úrslitum.
SR er ósigrað í 10 síðustu leikjum en hefur ekki tapað í venjulegum leiktíma í 14 síðustu leikjum sínum.

Tölfræði liðsins var frábær en liðið átti 5 stigahæstu leikmenn Toppdeildarinnar; Alex, Hákon, Kára, Sölva og Styrmi. Hákon Magnússon var stigahæsti varnarmaður deildarinnar, Eduard í fimmta og Haukur Steinsen í sjötta. Ævar Björnsson var besti markvörður deildarinnar.

Í úrslitum átti SR þrjá stigahæstu leikmennina; Hákon, Axel og Níels en í topp 10 voru einnig Heiðar, Þorgils og Styrmir. Hákon var aftur stigahæstur varnarmanna, Þorgils í þriðja og Eduard í fjórða. Bestu markvörður úrslitanna var Jóhann Ragnarsson og líklega maður úrslitarimmunnar.

Þetta er 8. Íslandsmeistaratitill karlaliðs SR og sá þriðji á fjórum árum. Jafnar þetta besta árangur SR 2006-2009 sem einnig sótti þrjá titla á fjórum árum; varð Íslandsmeistari 2006, 2007 og 2009.

Þetta er ekki í fyrsta skiptið sem SR sópar SA í úrslitum 3-0. Fyrst gerðist það árið 1999 en í annað skiptið árið 2006 en þá lyfti liðið bikarnum heima í Laugardalnum, líkt og nú.

Liðið hefur fjórum sinnum innsiglað Íslandsmeistaratitlinn á heimavelli, árið 2000, 2006, 2009 og í ár 2026.

Við óskum leikmönnum, þjálfurum, sjálfboðaliðum og félaginu öllu til hamingju með titlana.

Ljósmynd: Hafsteinn Snær Þorsteinsson
Myndband: Bjarni Helgason

Bæði lið SR spila til úrslita í ár

Bjarni Helgason — Tue, 03 Mar 2026 17:39:47 +0000

Það verður magnaður mars í Skautahöllinni í Laugardal þegar bæði karla- og kvennalið félagsins keppa til úrslita.

Kvennalið SR er í úrslitum í fyrsta skiptið í sögunni og karlaliðið varð á dögunum deildarmeistari í fyrsta sinn síðan 2015.

Merkið í dagatalið því af þessu vill enginn missa.

Liðið sem fyrst sigrar þrjá leiki lyftir bikarnum og fagnar Íslandsmeistaratitlinum 2026

*Leikur fjögur og fimm fara fram ef annað liðið sigrar ekki alla þrjá

3000 kr. við hurð

2500 kr. í forsölu á Stubb

Frítt fyrir 12 ára og yngri

Athugið að árskort gilda ekki á úrslit

Þetta verður veisla fyrir öll skilningarvit sem enginn má missa af.

Málum pallana bláa og höfum hátt – styðjum við bakið á SR í stærsta leik tímabilsins!

Metfjöldi sótti minningarleik um Patta

Bjarni Helgason — Tue, 24 Feb 2026 20:33:34 +0000

Patreks Freys Sveinssonar, sem lést í hræðilegu umferðarslysi á Miklubraut 5. febrúar, var minnst á eftirminnilega hátt í Skautahöllinni í Laugardal þriðjudaginn 11. febrúar s.l. Leikurinn, milli karlaliða SR og Fjölnis, var tileinkaður minningu Patta og rann öll miðasala, kökusala og pökkakast óskipt í fjölskyldu hans.

Það er nánast öruggt að aldrei hafa jafn margir komið á íshokkíleik á Íslandi því höllin var stappfull, vel yfir 1.100 mættu á leikinn og sáu SR sigra Fjölni örugglega með sex mörkum gegn einu.

Ljósmynd, Sævar Jónas

Hjartnæm og falleg minningastund var fyrir leik þar sem bæði lið, liðsfélagar Patta úr U18 liði SR, dómarar, prestur fjölskyldunnar og formenn beggja deilda stóðu saman og mynduðu hring í mínútuþögn.

Í leikhléi var spilað minningarmyndband með myndbrotum og ljósmyndum frá vinum Patta og fjölskyldu undir laginu Vor í Vaglaskógi í lifandi flutningu Hreims Heimissonar.

Kvennalið SR og SA vottuðu Patta og fjölskyldu svo virðingu í leik sínum föstudaginn 14. febrúar er liðin mættus í Laugardalnum. Samskonar minningarstund var haldin fyrir leik þar sem liðin minntust látins félaga.

Þess má geta að foreldrar og fjölskylda Patta mættu á báða leikina.

Patrekur var jarðsunginn mánudaginn 23. febrúar í Grafarvogskirkju og kistan borin út í gegnum heiðursvörð liðsfélaga hans úr SR.

Við minnumst Patreks með hlýhug og góðs liðsfélaga sem verður sárt saknað

#12
Patrekur Freyr Sveinsson
2009-2026

Forsíðumynd, Karítas Sveina Guðjónsdóttir

Ljósmynd, Sævar Jónasson

Silfur í Sarajevo hjá U18 drengjum

Bjarni Helgason — Mon, 23 Feb 2026 19:07:11 +0000

Alþjóða íshokkísambandið prufukeyrði nýtt fyrirkomulag á þessu móti í Bosníu. Liðunum var skipt í tvo hópa þar sem fyrst voru leiknir þrír leikir eftir styrkleikaröðun, áður en tekið var til við undanúrslit og úrslit.

Í fyrsta leik mætti Ísland veikburða liði Lúxemborgar og sigraði örugglega 12–1. Í næsta leik voru það Túrkmenar sem reyndust einnig lítil fyrirstaða fyrir okkar drengi og lokatölur 5–1. Í þriðja leiknum mættu þeir Tælendingum, fyrstu raunverulegu andstæðingum mótsins, og fyrirfram var talið líklegt að baráttan um gullið yrði við þá. Leikurinn var jafn og spennandi. Ísland var örlítið sterkari, en Tælendingar vörðust vel, með góðan markvörð og voru fljótir að refsa fyrir mistök. Leikurinn endaði með fyrsta tapi Íslands á mótinu, 4–2.

Ísland mætti heimamönnum frá Bosníu í undanúrslitum og eftir að hafa hrist þá af sér eftir fyrsta leikhluta varð niðurstaðan öruggur 8–2 sigur. Tæland vann einnig sín undanúrslit örugglega og því ljóst að liðin myndu mætast á ný í úrslitaleik um gullið.

Ísland var klárlega sterkari aðilinn í gullleiknum og yfirspilaði andstæðingana í skotum, 27 gegn 12 í fyrstu tveimur leikhlutunum, og fór með 2–1 forystu inn í lokaþriðjunginn. Þar komust Tælendingar hins vegar yfir með tveimur mörkum á skömmum tíma, en Ísland sýndi mikinn karakter og jafnaði fyrir leikslok. Það var þó Tæland sem tryggði sér sigurinn í framlengingu og tók gullið. Þeir geta þakkað markverði sínum, sem gerði okkar strákum lífið leitt í báðum leikjum með frábærri frammistöðu og var að lokum valinn besti markvörður mótsins.

Hér er samantekt úr tölfræði mótsins fyrir leikmenn félagsins en SR-ingar komu mikið við sögu:

Ýmir Hafliðason Garcia
– 7 mörk og 5 stoðsendingar
– 5. stigahæsti á mótinu og stigahæstur Íslendinga
– +5 í +/-
– Maður leiksins gegn Turkmenistan
– Valinn besti leikmaður Íslands á mótinu af mótsnefnd

Helgi Bjarnason, fyrirliði liðsins
– 5 mörk og 3 stoðsendingar
– 8. stigahæsti á mótinu og annar stighæstur Íslendinga
– +4 í +/-
– 69% Faceoff sigrar í öðru sæti á mótinu
– Maður leiksins í fyrri leiknum gegn Tælandi

Sæmundur Þorsteinsson
– 2 stoðsendingar
– +10 í +/- í þriðja sæti á mötinu og efstur Íslendinga
– Valinn besti varnarmaður mótsins af mótsnefnd

Þorsteinn Óli Garðarson
– 1 mark og 2 stoðsendingar
– +6 í +/-
– 56% Faceoff sigrar og í 8. sæti á mótinu