Skautafélag Reykjavíkur er með tvær deildir, listskautadeild og íshokkídeild. Reka báðar deildir skautaskóla og eru áherslur, lengd námskeiða og aðferðir ólíkar en afskaplega skemmtilegar. Vinsamlegast kynnið ykkur starf skautaskóla deildanna hér að neðan.
Skautaskólinn er fyrir byrjendur og styttra komna á aldrinum 4-11 ára. Unglinganámskeið er fyrir krakka á aldrinum 12-17 ára, sjá nánar hér og síðast en ekki síst bjóðum við upp á námskeið fyrir fullorðna 18 ára og eldri. Kennt er tvisvar sinnum í viku en tímarnir samanstanda af upphitun á gólfi og ísæfingu.
Íshokkískóli SR er ætlaður þeim sem eru að stíga sín fyrstu á skautum – byrjendum á leik- og grunnskólaaldri. Íshokkískólinn er tvisvar í viku og er leitast við að halda æfingagjöldum í lágmarki. Markmið Íshokkískólans er að kenna þátttakendum að skauta í gegnum leiki og þrautir og hafa gaman í leiðinni. Íshokkískólinn er fyrir alla enda er íshokkí frábær íþrótt fyrir öll kyn.